Ibicumbi by’Intwari z’Igihugu ni ahantu Abanyarwanda bibukira, bagaha icyubahiro Intwari z’Igihugu ndetse bakanahigira indangagaciro z’umuco w’ubutwari zubatse Igihugu, zikakirinda ndetse zikagiteza imbere.

Igicumbi cy’Intwari z’Igihugu giherereye i Remera mu Mujyi wa Kigali ni kimwe mu bicumbi by’Intwari bitatu biri mu Rwanda. Ibindi ni Igicumbi cy’Ubunyarwanda giherereye i Nyange mu Karere ka Ngororero n’Igicumbi cy’Ubumuntu giherereye mu Karere ka Rubavu.

Ku wa 12/6/2025, itsinda ry’abanyeshuri baturutse mu ishuri rya Polisi y’u Rwanda riherereye i Musanze ryasuye Igicumbi cy’Intwari z’Igihugu giherereye i Remera mu Karere ka Gasabo. Iri tsinda rigizwe n’abanyeshuri baturutse muri Polisi y’u Rwanda, Urwego rw’Igihugu rushinzwe Imfungwa n’Abagororwa (RCS) n’abaturutse mu rwego rw’Igihugu rushinzwe Ubugenzacyaha (RIB). Aba banyeshuri basobanuriwe Indangagaciro na Kirazira z’umuco Nyarwanda n’amateka y’umuco w’ubutwari mu Rwanda.

Nicolas RWAKA “Division Manager” mu Rwego Rushinzwe Intwari z’Igihugu, Imidari n’Impeta by’ishimwe (CHENO), yabasobanuriye ko Ubutwari mu Rwanda ari umurage w’abakurambere bagiye bitanga mu bihe bigoye bagakiza u Rwanda. Yatanze ingero nk’Abacengeri, Abaryankuna n’abatabazi. 

CSP Antoine MUNYAMPUNDU umuyobozi ushinzwe amasomo (Coordinator Police junior command and staff courses) mu ishuri rya Polisi rya Musanze ari na we wari uyoboye itsinda yavuze ko gusura Igicumbi cy’Intwari z’Igihugu ari ingirakamaro cyane mu rwego rwo kumenya amateka y’Igihugu no gukomeza kurangwa n’indangagaciro z’ubutwari mu mwuga bakora.

Bwana Nicolas RWAKA, Division Manager atanga ikiganiro ku mateka y’ubutwari mu Rwanda i Remera ku wa 12/6/2025.

CSP Antoine MUNYAMPUNDU umuyobozi ushinzwe amasomo (Coordinator Police junior command and staff courses) mu ishuri rya Polisi riherereye i Musanze atanga ubutumwa, Remera ku wa 12/6/2025.

Abanyeshuri baturutse mu ishuri rya Polisi riherereye i Musanze bakurikirana ikiganiro ku mateka y’ubutwari mu Rwanda, ku wa 12/6/2025.

Abanyeshuri beretswe Imva n’Ibimenyetso by’Intwari biri mu bice bigize Igicumbi cy’Intwari z’Igihugu.

Abanyeshuri basobanuriwe amateka y’Intwari n’ibikorwa byaziranze, Remera ku wa 12/6/2025.

Itsinda ryasuye hamwe n’abakozi ba CHENO babakiriye bafashe ifoto y’urwibutso.

Imva n’Ibimenyetso ni bimwe mu bigize Igicumbi cy’Intwari z’Igihugu giherereye i Remera.

Ubusitani ni kimwe mu bigize Igicumbi cy’Intwari z’Igihugu.